L’ispiraziun é valch ch’an pó ciafé indlunch, al basta madër tigní edli y cör daverc por se dé jö para. Na racoiüda de poesies é n ejëmpl concret de ci che pó nasce da pinsiers sön le iade. A Timo Craffonara, n jonn maester creatif, ti éra jüda insciö: metü man ál da scrí tl secundo ann de stüde, te bus, tratan che al jô ia Porsenú y indô ca. “Te bus odôi chi berbesc y chës mëdes che ciarâ intoronn o da finestra fora, tratan che i jogn ne ti metô gnanca averda, deache ai ascutâ musiga”, dijel. “Spo n iade m'al ái n püch ciacolada cun n te berba y a ël ti ál salpü beliscimo da partí cun me sü recorc de vita”, cunta l’autur. Insciö ál spo zedü da ascuté musiga y metü man da ciaré ince ël da finestra fora, da se fá n valgügn pinsiers che al á spo trascrit. Dedô ál spo sambëgn ince scrit poesies fora de bus.
Süa lirica é caraterisada da temesc personai y universai, te n stil modern dër individual. Les ilustraziuns de Gabi Mutschlechner abelësc chësc pice liber dal design che respidlëia l‘individualité de sü contignüs. Na publicaziun ch’an pëia zacó ince ite ion por se dé jö cun chi eserzizi dl pinsier che ma la poesia sá da se dé da fá.
Ann de publicaziun 2022
Autur: Timo Craffonara
64 plates
Lingaz: ladin
Prisc: 15.00€