Al é da püch gnü fora de stamparia le liber nü de poesies "pontins y parores" de Teresa Palfrader, auturia da La Pli de Mareo. La racoiüda de poesies scrites danter le 1980 y le 2010 gnarà presentada la jöbia, ai 8 de merz, dales 18.00, tl Istitut Ladin "Micurà de Rü" a San Martin.
Danfora en cört sura le liber: tl liber n’é les poesies nia arcunciades cronologicamënter, mo do cin perts. Cin dessëgns dl artist conesciü Franz Kehrer é metüs pormez ai capitui. Val’ poesia à la traduziun tl talian y/o tl todësch fata dal’auturia. Döes é les poesies todësces cun la traduziun por ladin. Le lingaz é ladin mareo ćiarè jö dal dr. Lois Craffonara. Le contignü dles poesies à da fà cun le vire da vigni dé, cun le monn da paur y l’ambiënt de paîsc, cun l’ester ëra al dedaincö y cun i monns che vignun/vignöna de nos cheriëia te süa imaginaziun.
Ann de publicaziun 2012
Parores de Teresa Palfrader
Dessëgns de Franz Kehrer
130 Plates
Lingaz: ladin
Prisc 8,00€