Dan da püch él gnü fora le liber de cronica dla Val Badia "Sas dla Crusc", dilan al gran laûr fat cun tröp impëgn y lezitënza dai cronisć de nosta valada. Chësc bel liber à oramai na storia bindebò lungia. Le pröm iade êl gnü dè fora ala fin di agn 1960, sciöche plata d'informaziun y de articui de storia y cultura por i mëmbri scrić ite ala Uniun di Ladins. Dl 1979 él spo deventè n liber de cronica, cun passa 650 plates de tesć y fotografies di avenimënć plü importanć sozedüs te nüsc paîsc ia por l'ann.
La cronica "Sas dla Crusc" é nasciüda y vëgn portada inant da porsones che à tl cör le sentimënt che la Val Badia é na realté soziala, linguistica y geografica che alda adöm y che dess gnì renforzada y mantignida. Cun la descriziun dl movimënt demografich dla popolaziun, di nasciüs y di morć, de nozes y iubilars, dl'ativité dles aministraziuns de comun y dles uniuns, vëgnel renforzè le liam danter paîsc y comuns: i imparun da se conësce y i se recordun de porsones y avenimënć che forma y concretisëia la storia, la popolaziun y la vita de nosta bela valada. Tl medemo tëmp inviëia la cronica, che se conzentrëia dantadöt sön l'ativité dles uniuns, da conscidré y bëgn inće da aprijé döt le laûr de volontariat che é ia dedô y che mët a florì la vita culturala, religiosa y recreativa.
La Uniun i dij porchël bel dilan ai cronisć che à indô daidé mëte adöm le liber, ai redadus, ai sostignidus finanziars y sambëgn inće a düć Os ch'i tolëis tla man le liber, ch'i le liëis y ti ćiarëis.
Publicaziun anuala
Auturs desvalies
plü de 700 Plates pur liber
Lingaz: ladin
Prisc Ediziun 2022: 24€